البكاء علي اللبن المسكوب شطاره

البكاء علي اللبن المسكوب شطاره
طبعا كلنا عارفين قصه الفلاحه الي حلبت بقرتها وشالت اناء اللبن فوق راسها وذهبت للسوق
في الطريق قالت اروح السوق ابيع اللبن اشتري بثمنه كتاكيت تاكل بواقي اكل البيت تكبر تحط بيض ابيع البيض واشتري معزه معشره
تولد اربي المعيز وابعهم اشتري كمان بقره
وهيه عماله تبني قصور من الوهم زلت قدمها في حفره وانسكب اللبن
واتعلمنا من القصه ان الطمع وحش وبيضيع حتي ما نملك
بس القصه ليها كماله اتعلمها النصابين والاغنياء والسياسيين وحفظوها سر من اعظم الاسرار عنا نحن الشعب الغلبان المحتار

باقي القصه يا ساده
ان الفلاحه جلست تبكي علي لبنها المسكوب والنساء يتندرن عليها
ولان كيد النساء غلب الاهلي ومنشستروينيتد
تفتق ذهن الفلاحه عن فكره العمر
بقر ايه وكتاكيت ايه ومعيز ايه
الكنز علي الارض محتاج بس الي يلمه
الفلاحه لمت الطينه مع اللبن وعجنتهم في الاناء واخذت تصرخ وتبكي بصوت اعلي وتدهن الطين الممزوج باللبن علي شعرها
وهي تصرخ قائله اه يا سري الي ضاع اه يا كنزي
هنا توقفت النساء عن الضحك وتجمعن من حب التطفل
مالك يختي فداكي لبن الدنيا كلها
متعمليش في نفسك كده يا حبيبتي دول شويه لبن ههههه
وهي تبكي ونتظر من طرف عينيها كم عدد النسوه حولها
وجرت الفتيات كل تجمع امها وصاحبتها لرؤيه الفلاحه المجنونه الي بتدهن شعرها بالطين
حتي اتت حماتها الملعونه
سكبتي اللبن يا فالحه ده ابو السباع حيقطعك
هنا مالت الفلاحه علي اذن حماتها وافضت لها بسرها
وهنا جلست الحماه تصرخ وتولول وتدهن الطين علي شعرها
اه ياختي يلي حظك دكر
ضاع سرك يا حبيبتي ده ذنب القدر

وهنا جلست النساء حولها يمثلن الحزن والاسي ويسئلن كنز ايه يا حجه
انتي مش شايفه ياختي حلاوه شعر مرات ابني
اه ولا ضفيرها
اه
ولا لمعان شعرها
ده شعر هنومه احلي شعر في االناحيه
واحلي من شعر بنات البندر
واديكم عرفتم السر يا نسوان
سر ايه ياوليه مانا شعري حلو اهو
لترد ست اخري لا بس شعر هنومه ام الشعور مالوش مثيل
وتعالت الاصوات واتفقت صحيبات يوسف علي ان شعر هنومه احلي شعر حتي يخرجن من مازق ان يكون شعر الجاره او الضره احلي
وهنا سكتت هنومه عن النحيب وقالت خلاص يا ام ابو السباع الكنر راح وضاع
لا يا حبيبتي متكونيش انانيه دول برضه ولاد بلدنا ويستهلوا كل خير
والنسوه ينظرن يمني ويسري ومافيش حد فاهم حاجه
وهنا عند ارتفاع درجه التوتر وحب الاستطلاع القاتل عند النساء نطقت هنومه بالسر
انا كل يوم اسكب اللبن هنا واخلطه بالطين من اليمه دي
واروح البندر ابيعه لبنات الذوات
وسر الطينه بالحليب هي سر جمال شعري
واخذت تدهن شعرها وشعر حماتها
احد النساء الطفيليات ارادت ان تاخذ حفنه من الاناء وتجرب علي شعرها
لا ابدا ميحصلش ده ثمنه غالي وكفايه انكم عرفتم السر
الوءه اي الاوقيه بنص جنيه
ده زمان لما كان الجنيه بيجيب خروف
والي تريد تجيب الفلوس وتيجي علي الدار
ورجعت هنومه وحماتها وهن يحملن القدر باللبن والطين كانه كنز ثمين
وهنا نشرت هنومه بناتها بان مرات العمده اشترت ثلاث اوقيات ومرات الشيخ اشترت ثلاثه ومرات الحكيم اشترت خمسه وان امهم خايفه ان الاغنيه يخلصوا علي الدهان
والفلاحات الغلابه يطلعوا من المولد بلا حمص
استشاط كيد النسا في قلوب الهوانم وكل واحده اخذت ما تملك من المال والماشيه حتي والابقار وذهبن لهنومه
وباعت هنومه كل الطين المخلوط باللبن وفي نص الليل خرجت هي وزوجها والوالاد والفلوس والبهايم من القريه البلهاء الفقيره
وعلي فكره دي هنومه هانم مرات ابو السباع باشا اول فلاح ياخد الباشويه
ودومتم

7,015 total views, 5 views today

Schreib einen Kommentar

Deine E-Mail-Adresse wird nicht veröffentlicht. Erforderliche Felder sind markiert *